حبيبي لا تكــبرها

حبيبي لاتكبرها ترى الضيقـه تجـي وتـروح

وانا طالبـك تكـفـى ياحبيـبـي لاتكبـرهـا

ترى الدعوى بسيطه لاتزوّد فالجـروح جـروح

وانا بكتب قصيـده فالمحبـه وأنـت شاعرهـا

أنا لولاك ماشيدت لي وسط القصيـد صـروح

تراك أجمل قصيـده حـب أكسرهـا وأجبرهـا

تراك أنت الوحيد اللي سكن وسط الجسد والروح

وتراك أحـلا عبـاره دايـم أكتبهـا وأرددها

تراك أنت البدر لامن طلع زاد الوضوح وضوح

تراك أحلام تصحيني ولا ادري كيـف افسرهـا

عطيتك من عروق القلب شيكٍ بالغـلا مفتـوح

وعطيتك كل كلمه من صميم القلـب مظهرهـا

وتخطي ثم تخطي بس أقول بخاطري مسمـوح

أنا وشلون أطالـع غلطتـك ياكيـف أناظرهـا

غيابك طال لين اصبح خبرنا بالعشق مفضـوح

وكلٍ عـارف القصـه مـن اولهـا لاخرهـا

وطعونك خلت اعروق المحبـه دمهـا مسفـوح

تعال وبشر اطعونك تـرى فـازت خناجرهـا

ترى مقدر على صدك ومهما تروح أنابـروح

اليـن القـاك واجـدد محبتـنـا واطـورهـا

وكلمه من ضميري قلتها لك تشفـي المجـروح

لجل عينك بكررهـا ولجـل حبـك بكررهـا